“Həzi Aslanov” stansiyasının dalanında aparılan əsaslı təmir və yenidənqurma işlərində son mərhələyə başlanılıb.

“Bakı Metropoliteni” QSC-dən verilən məlumata görə, işlər ümumilikdə 280 metrə yaxın ərazini əhatə edir və üç mərhələdə həyata keçirilir.

İndiyədək təmir-bərpa işləri başa çatdırılıb, yan divarlar və döşəmə boyunca məhlulvurma-hamarlama işləri görülüb. Eyni zamanda döşəmə, divar və tavan hissələri gücləndirilib, orta yolların arakəsmə divarları yenidən inşa olunub.

Metropoliten qeyd edib ki, layihə stansiyanın dalanının və ümumilikdə stansiyanın dayanıqlılığının artırılmasına yönəlib.

Yenidənqurma işləri 2025–2030-cu illər üzrə Dövlət Proqramının icrasına dair tədbirlər planı əsasında həyata keçirilir.

İşlərin noyabr ayının sonunda yekunlaşdırılması planlaşdırılır.