Diplomatik və xüsusi missiya məqsədilə Azərbaycana səfər edən şəxslərin qeydiyyatı üzrə prosedurların yenilənməsi təklif edilir.

Məlumata görə, bununla bağlı məsələ Milli Məclisin Hüquq siyasəti və dövlət quruculuğu komitəsinin iclasında müzakirə olunan Miqrasiya Məcəlləsinə dəyişiklik layihəsində öz əksini tapıb.

Təklifə görə, xarici dövlətlərin Azərbaycandakı diplomatik nümayəndəliklərinin və konsulluqlarının, beynəlxalq təşkilatların orqan, bölmə və nümayəndəliklərinin əcnəbi və ya vətəndaşlığı olmayan əməkdaşları, onların ailə üzvləri, eləcə də diplomatik və müəyyən hallarda xüsusi missiya ilə ölkəyə gələn şəxslər Azərbaycanda 15 gündən artıq müvəqqəti qaldıqda dövlət qeydiyyatına alınacaqlar.

Layihə ilə həmin şəxslərin qeydiyyatı üçün nəzərdə tutulan kateqoriyaların daha dəqiq müəyyənləşdirilməsi planlaşdırılır.

Eyni zamanda qeydiyyat vəsiqələrinin verilməsi və rəsmiləşdirilməsi prosedurlarının elektron sistemlər üzərindən təkmilləşdirilməsi nəzərdə tutulur. Müvafiq məlumatların Vahid Miqrasiya Məlumat Sisteminə daxil edilməsi ilə bağlı qaydalar da yenilənəcək.

Qanun layihəsində qeydiyyat vəsiqəsinin təsviri, spesifikasiyası və nümunəsinin təsdiqlənməsi, həmçinin qeydiyyat qaydalarının müəyyən edilməsi ilə bağlı müddəalar yer alıb.

Dəyişikliklərin digər hissəsi rəsmi səfər məqsədilə verilən giriş vizalarının şamil olunduğu şəxslərin dairəsinin dəqiqləşdirilməsinə və Miqrasiya Məcəlləsinin müddəaları arasında uyğunluğun təmin edilməsinə yönəlib.