Bakının Xətai rayonunda yetkinlik yaşına çatmayan şəxsin ölümü ilə bağlı araşdırma aparılır.

Baş Prokurorluğun məlumatına görə, hadisə sentyabrın 13-də baş verib. İlkin araşdırma zamanı yeniyetmənin hündürmərtəbəli binadan özünü atdığı müəyyən edilib.

Araşdırma çərçivəsində yeniyetmənin “Roblox” oyun platformasında onun psixoloji vəziyyətinə mənfi təsir göstərən zərərli məzmun və çağırışlarla qarşılaşdığı müəyyənləşdirilib.

Hazırda yeniyetmənin istifadə etdiyi elektron qurğular vasitəsilə daxil olduğu internet resursları, qarşılaşdığı məzmunun xarakteri və bunun onun psixoloji vəziyyətinə və davranışına mümkün təsiri araşdırılır.

Baş Prokurorluq qeyd edib ki, internet və sosial şəbəkələrdə yayılan bütün məzmunlar uşaqlar üçün təhlükəsiz deyil. Yaş həddinə uyğun olmayan, psixoloji təsir göstərən və təhlükəli davranışlara sövq edə bilən məzmunlar ciddi risk yarada bilər.

Qurum valideynlərə uşaqların internet və sosial platformalardan istifadəsinə nəzarəti gücləndirməyi, elektron qurğuların təhlükəsizlik imkanlarından istifadə etməyi və uşaqların onlayn fəaliyyətinə diqqət yetirməyi tövsiyə edib.

Eyni zamanda, uşaqların davranışındakı dəyişikliklərə həssas yanaşılması, onları narahat edən məzmunların vaxtında müəyyənləşdirilməsi və bu barədə onlarla açıq, etibarlı ünsiyyət qurulmasının vacibliyi vurğulanıb.

Araşdırmanın nəticələri ilə bağlı ictimaiyyətə əlavə məlumat veriləcək.