“Cənubi Qafqazda təhlükəsizlik və əməkdaşlıq” mövzusunda keçirilən beynəlxalq akademik konfransın iştirakçıları işğaldan azad edilmiş ərazilərə səfər ediblər.

Sentyabrın 9-dan 11-dək davam edən səfər Beynəlxalq Münasibətlərin Təhlili və Multikulturalizm Mərkəzi (BMTMM) və İsveçrənin St. Gallen Universitetinin təşkilatçılığı ilə reallaşıb.

İsveçrə, Almaniya, Misir, ABŞ və Fransadan olan ekspert və tədqiqatçılar Şuşa, Laçın, Zəngilan, Füzuli və Ağdamda olublar.

Səfərin əsas məqsədi qonaqların işğaldan azad edilmiş ərazilərdəki mövcud vəziyyət, işğal nəticəsində törədilmiş dağıntılar, mina təhlükəsi və həyata keçirilən bərpa-quruculuq layihələri ilə yaxından tanış olması olub.

Qonaqlar Zəngilanın Ağalı kəndində “Ağıllı kənd” layihəsinə baxış keçirib, Zabux kəndində aparılan yenidənqurma işləri ilə tanış olublar. Füzuli və digər ərazilərdə yaradılan yeni yaşayış məntəqələri, sosial obyektlər və nəqliyyat infrastrukturu barədə də məlumat verilib.

Ağdamda sənaye kompleksi, dəmiryol vağzalı və digər layihələr təqdim olunub. Bildirilib ki, bu layihələr işğaldan azad edilmiş ərazilərin inkişafı və keçmiş məcburi köçkünlərin öz yurdlarına qayıdışının təmin edilməsi baxımından mühüm əhəmiyyət daşıyır.

Səfər proqramı çərçivəsində ANAMA-nın Ağdam rayonunda həyata keçirdiyi minatəmizləmə fəaliyyəti də nümayiş etdirilib. Xarici ekspertlərə mina və digər partlayıcı qurğuların yaratdığı təhlükə, onların zərərsizləşdirilməsi istiqamətində görülən işlər barədə ətraflı məlumat verilib.

İştirakçılar həmçinin “Böyük Qayıdış” Proqramı çərçivəsində həyata keçirilən tədbirlər, yeni yaşayış məntəqələrinin salınması, sosial və iqtisadi infrastrukturun qurulması və keçmiş məcburi köçkünlərin mərhələli şəkildə geri qayıdışı barədə məlumat əldə ediblər.