Nazir məktəb direktorlarına müraciət etdi: “Çox şey sizdən asılıdır”
Təhsil sistemində qarşıda mühüm işlərin dayandığını bildirən elm və təhsil naziri Emin Əmrullayev məktəb direktorlarının rolunu xüsusi vurğulayıb.
E.Əmrullayev bu barədə təhsil işçilərinin sentyabr konfransında danışıb.
Nazir bildirib ki, məktəblərdə idarəetmənin düzgün qurulması, direktorların davranışı və məktəbdaxili mühitin təşkili təhsil nəticələri baxımından mühüm əhəmiyyət daşıyır.
“Qarşıda, təbii ki, çox işimiz var. İşimiz çoxdur. Sizin davranışınızdan, idarəetmə bacarığınızdan, məktəbdaxili mühiti düzgün təşkil etməyinizdən çox şey asılıdır”, - deyə E.Əmrullayev qeyd edib.
Onun sözlərinə görə, dövlət bu istiqamətdə dəstək göstərir, prosesləri tənzimləyir və nəzarəti həyata keçirir.
Nazir əsas məqsədlərdən birinin təhsil sistemində vahid yanaşmanın formalaşdırılması olduğunu bildirib. E.Əmrullayev qeyd edib ki, müəyyən edilmiş qaydalar məktəblərə düzgün çatdırılmalı və müəllimlərə ətraflı izah edilməlidir.
“Biz sistem olaraq işləməyi öyrənməliyik. Bizim üçün fərdilik, fərdi arzular yox, ümumi müəyyən edilmiş qaydalar əsas olmalıdır”, - deyə nazir vurğulayıb.
