Dövlət İmtahan Mərkəzi (DİM) 2027-ci ildə keçiriləcək 9 və 11 illik təhsil səviyyələri üzrə buraxılış imtahanlarının proqramlarını təqdim edib.

Məlumata görə, ümumi orta təhsil səviyyəsi üzrə Azərbaycan bölməsində Azərbaycan dili, riyaziyyat və xarici dil, rus bölməsində isə rus dili, riyaziyyat, xarici dil və Azərbaycan dili (dövlət dili) fənləri üzrə proqramlar açıqlanıb.

Tam orta təhsil səviyyəsində də Azərbaycan bölməsi üçün Azərbaycan dili, riyaziyyat və xarici dil, rus bölməsi üçün rus dili, riyaziyyat, xarici dil və Azərbaycan dili (dövlət dili) üzrə proqramlar müəyyənləşdirilib.

DİM qeyd edib ki, 9 illik buraxılış imtahanında 2026-cı ildə tətbiq olunan modeldən istifadə olunacaq. 11 illik təhsil səviyyəsində isə Azərbaycan və rus dilləri, eləcə də riyaziyyat fənləri üzrə ötənilki imtahan modeli saxlanılacaq.

Xarici dil imtahanında dinləyib-anlama, oxuyub-anlama, qrammatika və leksika, həmçinin yazı bacarıqları qiymətləndiriləcək.

Dinləyib-anlama bölməsində bir mətn və 4 tapşırıq, oxuyub-anlama bölməsində isə 2 mətn və hər birinə aid 4 tapşırıq təqdim ediləcək. Qrammatika və leksika üzrə 13 qapalı tipli tapşırıq nəzərdə tutulur.

Yazı bacarığının qiymətləndirilməsi zamanı iştirakçıdan verilmiş sual və ya fikir əsasında öz mövqeyini əsaslandırması və fikirlərini yazılı şəkildə ifadə etməsi tələb olunacaq.

Xarici dil üzrə dinləyib-anlama bacarıqları ingilis, alman, fransız, rus, ərəb və fars dilləri üzrə yoxlanılacaq.

DİM-in məlumatına əsasən, Azərbaycan dili (dövlət dili) üzrə həm 9, həm də 11 illik təhsil səviyyələrində 2026-cı ilin imtahan modeli tətbiq ediləcək.

Proqramların hazırlanması zamanı hazırda 9 və 11-ci siniflərdə təhsil alan şagirdlərin keçdikləri dərsliklər nəzərə alınıb. Yeni dərsliklərlə bağlı materialların həmin siniflərdə tədris olunmadığı üçün proqramlara daxil edilmədiyi bildirilib.

DİM vurğulayıb ki, proqramlara dərslikdən kənar mövzular daxil edilməyib. Əsas ədəbiyyat siyahısında ümumtəhsil müəssisələrində istifadə olunan dərsliklərə yer verilib.

2027-ci il buraxılış imtahanları ilə bağlı proqramlar, seçilmiş altstandartlar, nümunə tapşırıqlar və yazılı cavab tələb edən tapşırıqların qiymətləndirmə meyarları “Abituriyent” jurnalının xüsusi buraxılışlarında dərc olunacaq.