Heydər Piriyevin zabit yoldaşları ilə nadir görüntüsü
General-leytenant Heydər Piriyevin zabit yoldaşları ilə birlikdə çəkdirdiyi foto sosial şəbəkələrdə gündəm olub.
Arxiv görüntüsü olduğu bildirilən fotoda Heydər Piriyev bir qrup zabitlə birlikdə yer alıb. Sözügedən foto onun uzun illər davam edən hərbi xidmət dövrünə aid görüntülərdən biri kimi təqdim edilir.
Heydər Kamal oğlu Piriyev 1959-cu ildə anadan olub. Hərbi fəaliyyətinə Sovet ordusunda başlayıb və 1991-ci ildən Azərbaycan Silahlı Qüvvələrində xidmət edib.
Birinci Qarabağ müharibəsi illərində döyüşlərdə iştirak edən Piriyev sonrakı dövrdə Azərbaycan Ordusunda bir sıra yüksək vəzifələrdə çalışıb. O, 2002-2009-cu illərdə Heydər Əliyev adına Ali Hərbi Məktəbə rəhbərlik edib.
2009-2013-cü illərdə Naxçıvan Muxtar Respublikasında Ordu Korpusunun qərargah rəisi vəzifəsində çalışıb. 2014-cü ildə Prezident İlham Əliyevin sərəncamı ilə general-leytenant ali hərbi rütbəsi alıb.
Piriyev sonrakı illərdə Silahlı Qüvvələrin Hərbi Akademiyasının rəisi vəzifəsində fəaliyyət göstərib.
2020-ci il Vətən müharibəsində xidmətlərinə görə “Azərbaycan Bayrağı” ordeni ilə təltif edilən general-leytenant 2022-ci ildə Milli Müdafiə Universitetinin rektoru təyin olunub. O, 2024-cü ildə həmin vəzifədən azad edilib.
