Azərbaycan və Ermənistan dövlət sərhədinin “Beynəlxalq Sülh və Rifah naminə Tramp Marşrutu”nun (TRIPP) keçəcəyi ayrı-ayrı hissələrində delimitasiya işlərinin aparılması mümkündür.

“Sputnik Ermənistan” xəbər verir ki, bunu Ermənistan parlamentinin Xarici əlaqələr üzrə daimi komissiyasının sədri, hakim “Vətəndaş müqaviləsi” fraksiyasının deputatı Sarkis Xandanyan jurnalistlərə açıqlamasında deyib.

Onun sözlərinə görə, TRIPP-in icrası çərçivəsində dəmir yolu, neft və qaz kəmərlərinin keçəcəyi ərazilərdə lokal delimitasiya işlərinin aparılması mümkündür.

Xandanyan bildirib ki, ümumi yanaşmaya əsasən, Azərbaycan-Ermənistan dövlət sərhədinin delimitasiyasının şimaldan cənuba doğru aparılması nəzərdə tutulur.

Qeyd edək ki, Azərbaycanın xarici işlər naziri Ceyhun Bayramov daha əvvəl iki ölkə arasında dövlət sərhədinin delimitasiyası prosesinin Azərbaycan, Ermənistan və Gürcüstan sərhədlərinin kəsişdiyi nöqtədən başlayaraq şimaldan cənuba doğru aparılması barədə razılığın əldə edildiyini bildirib.