Emin Əmrullayev valideynlərə müraciət etdi: “Bu, təhsilə müsbət təsir göstərər”
Valideynlərin uşaqlarının dərsləri və əldə etdiyi biliklərlə mütəmadi maraqlanması onların təhsil göstəricilərinə təsir edir.
Bu barədə elm və təhsil naziri Emin Əmrullayev İTV-nin “Diqqət mərkəzi” proqramında açıqlama verib.
Nazir bildirib ki, valideynlərin övladlarına gündəlik öyrəndikləri barədə sual verməsi belə təhsil prosesinə müsbət təsir göstərə bilər.
“Valideyndən çox şey tələb etmirik, sadəcə uşağından soruşsa ki, bu gün nə öyrənmisən, bu, təhsilə müsbət təsir edər”, - E.Əmrullayev deyib.
Onun sözlərinə görə, aparılan araşdırmalar da valideyn marağının şagirdlərin nəticələrində fərq yaratdığını göstərir.
“Övladının nə öyrəndiyi ilə həftədə ən azı bir dəfə maraqlananların nəticəsi 451 baldır. Heç vaxt maraqlanmayanların göstəricisi isə 409 bal olub. Yəni nəticələr arasında 42 bal fərq var”, - deyə nazir qeyd edib.
E.Əmrullayev vurğulayıb ki, təhsildə müsbət nəticələrin əldə olunması üçün ən sadə addımlar belə əhəmiyyətlidir. Nazir qeyd edib ki, dövlət tərəfindən görülən işlərlə yanaşı, valideynlərin dəstəyi təhsil sahəsində irəliləyişlərin daha sürətli əldə edilməsinə imkan yarada bilər.
