Aqrar Subsidiya Şurası kənd təsərrüfatı, heyvandarlıq, balıqçılıq və akvakultura üzrə dövlət dəstəyi mexanizmlərində yenilikləri təsdiqləyib.

Yeni qərar kənd təsərrüfatında məhsuldarlığın artırılması, müasir suvarmanın genişləndirilməsi, emal və ixrac imkanlarının artırılması, yerli toxumçuluğun inkişafı və ərzaq təhlükəsizliyinin gücləndirilməsini nəzərdə tutur.

Ən mühüm dəyişikliklərdən biri əkin subsidiyalarının suvarma texnologiyasına uyğun diferensiallaşdırılmasıdır. 22 ixtisaslaşmış rayonda müasir suvarma ilə yetişdirilən buğda üçün fermerə 400 manat/ha, ənənəvi suvarma və dəmyə əkinləri üçün 200 manat/ha ödəniləcək.

Kartof, tərəvəz, noxud, lobya və digər paxlalılar üzrə müasir suvarma tətbiq edilən sahələrdə subsidiya 500 manat/ha, bostan bitkilərində isə 310 manat/ha təşkil edəcək.

Dağlıq rayonlarda və Naxçıvanda kartof və tərəvəz əkinlərinə dəstək 400–600 manat/ha arasında olacaq.

Fermerlərin su və torpaq resurslarından daha səmərəli istifadə etməsi üçün lazer hamarlama texnologiyasının tətbiqi də əlavə subsidiyalaşdırılacaq. İlk il buğda əkininə görə 250 manat/ha, pambıq üzrə isə 50 manat/ton əlavə subsidiya nəzərdə tutulur.

İstixanalara verilən dəstəyin məbləği onların texnoloji səviyyəsinə əsasən müəyyən ediləcək. Beləliklə, subsidiya 500 manatdan başlayaraq 5000 manat/ha-dək yüksələcək.

İxrac potensialı yüksək olan məhsulların istehsalına da yeni dəstək veriləcək. Aroniya bağları üçün 7500 manat/ha, qızılgül əkinləri üçün 6000 manat/ha subsidiya müəyyənləşdirilib.

Butik şərabçılığın inkişafı məqsədilə 5–20 hektar sahədə salınan super-intensiv üzüm bağlarına 20 min manat/ha, intensiv bağlara isə 10 min manat/ha subsidiya ödənilməsi nəzərdə tutulur.

Bağçılıq üzrə bəzi subsidiya şərtləri də yumşaldılır. İntensiv zeytun bağlarında minimum sahə tələbi 5 hektara endiriləcək. Naxçıvan Muxtar Respublikasında bağlar üzrə minimum sahə 1 hektar müəyyən olunacaq.

Pambıq istehsalında suvarma üsuluna görə fərqli subsidiya tətbiq ediləcək. Damcı suvarmadan istifadə edən fermerlərə 300 manat/ton, sprinkler və pivot sistemlərindən istifadə edənlərə 215 manat/ton, ənənəvi suvarma tətbiq edənlərə isə 200 manat/ton veriləcək.

Emal sənayesinin xammal təminatının yaxşılaşdırılması üçün texniki üzüm, zeytun, xurma, badam, qızılgül, biyan və pivəlik arpa üzrə yeni məhsul subsidiyaları tətbiq olunacaq.

Beynəlxalq sertifikatların alınması da dövlət tərəfindən maliyyələşdiriləcək. Sertifikatın növündən asılı olaraq subsidiyanın məbləği 7000–36 000 manat olacaq.

Fermerlər üçün daha bir yenilik əkin subsidiyasının bir hissəsinin əvvəlcədən alınması imkanının yaradılmasıdır. Müəyyən edilmiş meyarlara uyğun gələn təsərrüfatlar subsidiyanın 30 faizini avans kimi əldə edə biləcəklər.

Heyvandarlıq sektorunda da yeni mexanizmlər qüvvəyə minəcək. 1 oktyabr 2026-cı ildən sonra yaradılan intensiv təsərrüfatlarda südlük və südlük-ətlik cins heyvanlara 1500 manat/baş, ətlik cinslərə 1000 manat/baş subsidiya veriləcək.

“Qarabağ” və “Dilbaz” cins atların saxlanmasına görə illik 600–1000 manat arasında subsidiya tətbiq olunacaq.

Akvakultura təsərrüfatlarında qızılbalıqkimilər və nərəkimilər üçün 2000 manat/ton, çəkikimilər və naxakimilər üçün 600 manat/ton məhsul subsidiyası müəyyən edilib.

Naxçıvanda yerli yumurta istehsalının dəstəklənməsi məqsədilə hər 1000 ədəd süfrəlik yumurtaya 30 manat subsidiya veriləcək.

Süd istehsalçıları üçün də yeni dəstək mexanizmi yaradılır. Emal müəssisələrinə və süd toplama məntəqələrinə təhvil verilən soyudulmuş xam südün hər litrinə 7 qəpik subsidiya ödənəcək. Kooperativlərə əlavə 20 faiz dəstək göstəriləcək.

Bundan başqa, diri çəkisi 600 kiloqramdan çox olan iribuynuzlu heyvanların kəsiminə görə hər kiloqram üçün 0,40 manat subsidiya tətbiq olunacaq.

Yeni qərar çərçivəsində texnika, suvarma sistemləri, soyuducu anbarlar, taxıl siloları və günəş panelləri üzrə güzəştlər də artırılacaq.

Sərhədyanı ərazilərdə kənd təsərrüfatı ilə məşğul olan fermerlərin subsidiya əmsalı isə baza əmsalından 0,5 bənd yüksək hesablanacaq.