Yeni tədris ilinin başlamasına az müddət qalmış paytaxt ərazisində yol təhlükəsizliyinin təmin olunması ilə bağlı hazırlıq tədbirləri davam etdirilir.

BDYPİ və AYNA-nın yaydığı birgə məlumatda məktəblərin yerləşdiyi ərazilərdə xüsusi nəzarət tədbirlərinin həyata keçirildiyi bildirilib.

Məktəblərin fəaliyyəti ilə əlaqədar həmin ərazilərdə nəqliyyat və piyada sıxlığının artacağı nəzərə alınaraq, yol hərəkətinin təşkili vəziyyəti diqqətlə qiymətləndirilir.

Bu çərçivədə mövcud yol nişanları və nişanlanma xətləri nəzərdən keçirilir, piyada keçidlərinin vəziyyəti yoxlanılır və müəyyən edilmiş çatışmazlıqların aradan qaldırılması üçün tədbirlər görülür.

Qurumlar məktəblərin qarşısında yol hərəkətinin təhlükəsizliyinə xidmət edən texniki vasitələrin vəziyyətinə də xüsusi diqqət yetirirlər.

Bildirilib ki, görülən işlər şagirdlərin məktəbə gediş-gəlişi zamanı təhlükəsiz şəraitin yaradılmasına xidmət edir.