Tanınmış teleaparıcı və iş adamı Ramal İsayev tarixi abidələrin üzərinə yazı yazılması hallarına münasibət bildirib.

 Ramal İsayev Azərbaycanın tarixi-mədəni irs nümunələrinin qorunmasının vacibliyini diqqətə çatdırıb.

O bildirib ki, xüsusilə Şuşa və Bakıda yerləşən qədim tikililər, qala divarları, qayalar və digər tarixi məkanlar xalqın keçmişini və milli yaddaşını əks etdirir.

Teleaparıcı bəzi şəxslərin bu məkanların üzərinə ad, tarix və müxtəlif ifadələr yazmasını yolverilməz hesab edib. Onun sözlərinə görə, bu davranış tarixi irsə hörmətsizliklə yanaşı, abidələrin görünüşünün pozulmasına da səbəb olur.

“Şuşanın hər daşı, Bakının hər tarixi binası və küçəsi keçmişimizdən bizə miras qalan dəyərdir. Bu irsin üzərinə yazılar yazmaq və müxtəlif formada müdaxilə etmək tarixi yaddaşımıza zərər vurur”, – deyə Ramal İsayev bildirib.

O, vətəndaşları tarixi-mədəni irsin qorunmasına həssas yanaşmağa çağırıb.