Moskvada yaşayan və sosial şəbəkələrdə “dr_julietta” adı ilə tanınan kosmetoloq Bakıda göz rənginin dəyişdirilməsi məqsədilə keçirdiyi keratopiqmentasiya əməliyyatından sonra görmə ilə bağlı narahatlıqlar yaşadığını açıqlayıb.

Urbaninfo.az 1news.az-a istinadən xəbər verir ki, kosmetoloq təxminən iki il əvvəl Bakıda oftalmoloq Cahid Şahbazov tərəfindən sözügedən əməliyyata məruz qaldığını bildirib. Onun sözlərinə görə, ilk vaxtlarda nəticədən razı olub və əməliyyatın uğurlu keçdiyini düşünüb. Lakin zaman keçdikcə, xüsusilə doğuşdan sonra görməsində müəyyən problemlər yaranmağa başlayıb.

Kosmetoloq son günlərdə görmə qabiliyyətinin pisləşdiyini hiss etdiyini və bununla bağlı uzunmüddətli tibbi müayinədən keçdiyini bildirib.

Onun sözlərinə görə, müayinələr zamanı görmə itiliyinin formal olaraq yüksək olduğu müəyyən edilsə də, gündəlik həyatda görmə keyfiyyəti ilə bağlı ciddi narahatlıqları var:

“Qaranlıqda və yan işıqda görmək mənə narahatlıq verir. Boyaya görə rənglər daha solğun görünür. Uzaqdakı əşyalar bulanıq görünür. Gözlərimdə sanki götürmək istədiyim bir pərdə var”.

Kosmetoloq yaranmış vəziyyətdən sonra gözlərindəki piqmenti sildirmək və təbii qəhvəyi göz rənginə qayıtmaq qərarına gəldiyini bildirib. O, bu məqsədlə Rusiyada mütəxəssislərə müraciət etməyə hazırlaşır.

Məsələ ilə bağlı Cahid Şahbazovun mövqeyi də öyrənilib. Həkimin köməkçisi pasiyentin səsləndirdiyi iddiaları təkzib edib və onun açıqlamalarının sosial şəbəkələrdə gündəm yaratmaq məqsədi daşıdığını bildirib.

Qeyd edək ki, Cahid Şahbazovun fəaliyyəti ilə bağlı bundan əvvəl də müxtəlif pasiyent şikayətləri ictimaiyyətə açıqlanıb.

Məlumata görə, həkimin fəaliyyəti ilə bağlı hüquq-mühafizə orqanları tərəfindən Azərbaycan Respublikası Cinayət Məcəlləsinin 314.1-ci maddəsi üzrə cinayət işi də başlanıb. Həmin maddə səhlənkarlıq nəticəsində ehtiyatsızlıqdan mühüm zərər və ya digər ağır nəticələrə səbəb olmanı nəzərdə tutur.