Bakının Sabunçu rayonunda, Balaxanı və Məmmədli kəndləri arasındakı çöllük ərazidə su axıntısı yaranıb.

“Qafqazinfo” xəbər verir ki, sakinlərin sözlərinə görə, ərazidə 2-3 gündür əsas kollektorda qəza baş verib. Nəticədə böyük həcmdə su əraziyə axaraq gölə bənzər sahə yaradıb.

Vətəndaşlar içməli su ilə bağlı çətinliklərin yaşandığı bir vaxtda suyun bu şəkildə israf olunmasından narahat olduqlarını bildiriblər. Onların sözlərinə görə, qəza baş verdikdən sonra uzun müddət ərazidə hər hansı müdaxilə olmayıb.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, Balaxanı ərazisində müşahidə olunan su axıntısı vantuzda yaranan nasazlıqla əlaqədardır.

Qurumun məlumatına görə, Bakı Sukanal İdarəsinin briqadası əraziyə cəlb olunub və problemin aradan qaldırılması istiqamətində işlər görülür.