CovertLabs və Firehound layihəsinin birgə araşdırmasına görə, 198 iOS tətbiqi istifadəçilərin şəxsi məlumatlarını sızdırıb. Bu barədə 9to5Mac xəbər verib.
Sızmalar nəticəsində adlar, e-poçt ünvanları, söhbət tarixçələri və digər həssas məlumatlar açıqlanıb. Ən ciddi sızma isə Chat & Ask AI adlı çat-bot tətbiqində qeydə alınıb. Tədqiqatçılara görə, bu proqram vasitəsilə 18 milyon istifadəçinin 406 milyon qeydi komprometasiya olunub. Ekspertlər istifadəçilərə bu xidmətdən təxirəsalınmaz olaraq imtina etməyi tövsiyə edirlər.
Sızmaların əsas səbəbi korrekt qorunmayan məlumat bazaları və bulud saxlama sistemləri göstərilib. Zərərçəkmiş tətbiqlərin böyük hissəsi süni intellekt xidmətləri və çat-botlar kateqoriyasına aiddir. Bununla yanaşı, siyahıda təhsil, əyləncə, fitness və sosial platforma tətbiqləri də yer alıb.
Apple şirkəti araşdırmanın nəticələrinə hələlik rəsmi münasibət bildirməyib. Ekspertlər xüsusilə süni intellektdən istifadə edən tətbiqlərdə məlumatların işlənməsi üzərində ciddi nəzarət aparılmasının vacibliyini vurğulayır və proqram təminatçılarını informasiya təhlükəsizliyinə üstünlük verməyə çağırırlar.

Urbaninfo.az