London məhkəməsi şahzadə Harri, Elton Con və digər məşhurları The Daily Mail qəzetinin naşirinə qarşı uduzduqları məhkəmə işi üzrə 13 milyon dollar məbləğində məhkəmə xərclərini ödəməyə məcbur edib. Bu barədə Sky News məlumat yayıb.

İyulun 7-də İngiltərə və Uels Ali Məhkəməsi bir qrup məşhurun Associated Newspapers Limited (ANL) şirkətinə qarşı qaldırdığı iddianı rədd edib. İddiaçılar şirkəti onların şəxsi həyatına müdaxilə etməkdə və məlumatları qanunsuz yollarla toplamaqda ittiham edirdilər.

İddiaçılar arasında şahzadə Harri və Elton Conla yanaşı, aktrisa Elizabet Herli, Sadi Frost, Lordlar Palatasının üzvü Doreen Lourens və İcmalar Palatasının keçmiş deputatı Saymon Hyuz da yer alıb.

The Daily Mail-in naşiri məhkəmə xərclərinin ödənilməsi üçün qrupdan ümumilikdə 34,5 milyon funt sterlinq (təxminən 47 milyon dollar) tələb edib. Bunun 9,9 milyon funt sterlinqinin (13,5 milyon dollar) ilkin ödəniş kimi verilməsi istənilib.

İddiaçıların vəkilləri isə ilkin ödənişin 7,9 milyon funt sterlinq təşkil etməli olduğunu müdafiə ediblər. Lakin hakim Metyu Niklin 9,5 milyon funt sterlinq ödənilməsinə qərar verib. Bu məbləğin sonrakı məhkəmə iclaslarında daha da artırıla biləcəyi bildirilib.

Associated Newspapers Limited məhkəmənin qərarını “jurnalistika üçün daha bir heyrətamiz qələbə” kimi qiymətləndirib.