Azərbaycanda, xüsusilə də Bakıda güclü külək artıq adi hava hadisəsi deyil, hər dəfə insan həyatı və əmlakı üçün ciddi təhlükəyə çevrilən sınaqdır. Demək olar ki, hər güclü küləkdən sonra aşan ağaclar, sınan budaqlar və zədələnən avtomobillərlə bağlı xəbərlər yayılır. Bəzən isə bu hadisələr insanların xəsarət alması, hətta faciə ilə nəticələnir.

Jurnalist Azər Qismət hesab edir ki, problemin əsas səbəbi təbiət deyil, ağacların vaxtında monitorinq olunmamasıdır. Onun fikrincə, yaşıllaşdırmaya cavabdeh qurumlar və nəzarət orqanları küləkdən əvvəl riskli ağacları müəyyən etsələr, belə hadisələrin sayı xeyli azalardı.

Ekspertlərin də tövsiyələrinə əsasən, güclü küləklərdən sonra və mövsüm başlamazdan əvvəl ağacların kök sistemi, gövdəsi və budaqları mütəmadi yoxlanılmalıdır. Kök hissəsində torpağın qalxması, torpaqda çatların yaranması, çürümüş gövdə, qabığın iri hissələrlə soyulması, quru budaqların çoxluğu və əvvəlki küləklərdə əyilmiş ağaclar potensial təhlükənin əsas əlamətləri hesab olunur.

Mütəxəssislər bildirirlər ki, gizli çürüməni müəyyən etmək üçün müasir diaqnostika avadanlıqlarından – rezistoqraf və səs tomoqrafiyası kimi texnologiyalardan istifadə olunmalıdır. Belə monitorinq dünyanın bir çox küləkli şəhərlərində mütəmadi aparılır və qəza riskini minimuma endirməyə kömək edir.

Müşahidələr göstərir ki, Bakıda hər güclü külək zamanı insanlar ağacların altından keçməyə ehtiyat edir. Bu isə problemin sistemli xarakter aldığını göstərir. Halbuki əvvəlcədən aparılan peşəkar monitorinq, təhlükəli ağacların dayaqlarla möhkəmləndirilməsi və ya zərurət yarandıqda kəsilməsi həm insan həyatını, həm də əmlakı qoruya bilər.

Mütəxəssislər vurğulayırlar ki, monitorinq yalnız külək tam səngidikdən sonra aparılmalı, təhlükə yaradan ağaclar isə aidiyyəti qurumlar tərəfindən dərhal qiymətləndirilməlidir. İctimai yerlərdə, yaşayış binalarının və elektrik xətlərinin yaxınlığında yerləşən riskli ağaclarla bağlı məlumatların operativ şəkildə aidiyyəti qurumlara çatdırılması da mühüm əhəmiyyət daşıyır.

Görünən odur ki, Bakıda hər il təkrarlanan bu mənzərənin qarşısını almaq üçün təkcə hava xəbərdarlıqları kifayət etmir. Əsas ehtiyac təhlükəli ağacların vaxtında aşkarlanması, müasir üsullarla monitorinqi və qabaqlayıcı tədbirlərin sistemli şəkildə həyata keçirilməsidir. Yalnız bu halda güclü külək növbəti dəfə insan həyatı üçün təhlükəyə çevrilməz.