"Özünə qəsd edən adam bu qədər gülləni özünə necə vura bilər?"
“Raminin nəşini gətirməyə əmiləri gediblər. Cəsədə baxanda görüblər ki, güllələr başından və çənəsinin altından dəyib. Üç güllə yeri olub. Özünə qəsd edən adam bu qədər gülləni özünə necə vura bilər? Elə birincidəcə ölər, yaxud huşunu itirər, qalar yerdə. İki gülləni kim atdı bəs ona?”.
Dövlət Sərhəd Xidmətinin (DSX) Horadiz qəsəbəsində yerləşən “N” saylı hərbi hissəsində həyatını itirən əsgər Ramin Cəbrayılovun nəşi mayın 24-də yaxınlarına təhil verilib. Qəzetçi-yə danışan Şaiq Balakişiyev qohumunun intihar nəticəsində öldüyünə inanmadığını deyib.
Onun bildirdiyinə görə, ailəsinə təhvil veriləndən sonra Raminin cəsədinin açılmasına icazə verilməyib, bildirilib ki, mərhumun nəşi Beyləqan məscidində yuyularaq kəfənlənib.
“O, atasını kiçik yaşlarında itirmişdi. Evin tək oğlu idi. Anasına, bacılarına Raminin üzünü son dəfə görməyə belə icazə vermədilər”, – deyə Şaiq Balakişiyev bildirib.
Raminin nəşi yaxınlarına təhvil verilən günün axşamı Qobustan rayonunun Çalov kəndində polisin və sərhəd qoşunlarının zabit, əsgər heyətinin nəzarəti altında dəfn edilib. Dəfndən foto və video çəkilişə icazə verilməyib.
Qazetçi.
Sosial şəbəkələrdə paylaş
