Bilgəhdəki Dubayın məşhur brendi olan “Jumeirah” oteli sökülür - İddia

Bakının Bilgəh qəsəbəsində yerləşən və bir vaxtlar paytaxtın ən dəbdəbəli hotellərindən hesab olunan Jumeirah Bilgah Beach Hotel sökülür. Bununla bağlı görüntülər və iddialar sosial şəbəkələrdə yayılıb.
Məlumatı sosial media hesabında jurnalist Anar Məmmədov paylaşıb. İddialara görə, illərlə Xəzər sahilinin simvollarından sayılan kompleks vaxtilə keçmiş Əmlak Məsələləri Dövlət Komitəsinin sədri Kərəm Həsənovun nəzarətində tikilib.
Hotel 2011-ci ilin sonunda böyük təmtəraqla istifadəyə verilmişdi. Açılış mərasimində Prezident İlham Əliyev və ailə üzvləri də iştirak etmişdi. Həmin dövrdə kompleks MDB məkanında “Jumeirah Group”un ilk layihəsi kimi təqdim olunurdu.
20 mərtəbəli kompleks Xəzər sahilində yerləşirdi və 176 otaq, villalar, aquapark, SPA mərkəzi, restoranlar və konfrans zalları ilə Bakının premium turizm layihələrindən biri hesab olunurdu. Otelin tikintisinin təxminən 4 il çəkdiyi, layihədə minlərlə işçinin çalışdığı açıqlanmışdı.
Lakin məşhur Dubay brendi ilə əməkdaşlıq uzun sürmədi. 2016-cı ildə “Jumeirah Group” Azərbaycan bazarını tərk etdi və idarəetmə müqaviləsi başa çatdı. Bundan sonra hotel rebrendinq edildi və “Jumeirah” adı tarixə qovuşdu.
Bir vaxtlar Bakının ən prestijli istirahət məkanlarından sayılan kompleksin bu gün sökülməsi sosial şəbəkələrdə geniş müzakirələrə səbəb olub. İstifadəçilərdən bəziləri bunu “bir epoxanın sonu” adlandırır, digərləri isə ərazidə yeni və daha iri layihənin hazırlanacağını iddia edir. Hazırda qeyri iş günləri olduğundan söküntünün səbəbi və ərazinin gələcək taleyi ilə bağlı rəsmi açıqlama verilməyib.
Sosial şəbəkələrdə paylaş