Kaliforniya Universiteti, Riversaydın tədqiqatçıları müəyyən zülallarla zəngin diyetin xolera bakteriyasının bağırsaqda koloniyalaşmasını xeyli azaltdığını sübut ediblər. Nəticələr Cell Host & Microbe jurnalında dərc olunub.
Siçanlar üzərində aparılan eksperimentdə tədqiqatçılar yağ, karbohidrat və zülallarla zəngin qidaların təsirini müqayisə ediblər. Ən güclü təsir kazein (süd zülalı) və buğda qlüteni ilə zəngin qidada müşahidə olunub: bakteriyaların bağırsaqda “yerləşmə” qabiliyyəti 100 dəfə azalıb.
Tədqiqatçılar izah edir ki, qoruyucu təsir yalnız zülal miqdarı ilə bağlı deyil. Kazein və qlüten xolera bakteriyalarının əsas mexanizmini – 6-cı tip sekresiya sistemi (T6SS)-ni bloklayır. Bu mikroskopik struktura bakteriyalara toksinləri enjekte etməyə və rəqib mikroorqanizmləri məhv etməyə imkan verir. T6SS-in zəifləməsi bağırsaqda koloniyalaşmanı çətinləşdirir.
Yağlarla zəngin diyet infeksiyaya demək olar ki, təsir göstərməyib, karbohidratlar isə yüngül effekt verib. Tədqiqatın həmmüəllifi Ansel Syao bildirib ki, zülalın növü nəticəyə əsas təsir göstərir.
Xolera hələ də suya çıxışın məhdud olduğu Afrika və Asiya bölgələrində ciddi problem olaraq qalır. Hazırda müalicə əsasən rehidratasiya ilə həyata keçirilir; antibiotiklər isə xəstəliyin müddətini qısaldır, amma bakterial toksinləri neytrallaşdırmır və geniş istifadəsi antibiotik müqavimətini artırır.
Alimlər bildirir ki, nəticələr hələ heyvanlarda əldə olunub, lakin insanlarda da oxşar effekt gözlənilir və bu hipotez növbəti tədqiqatlarda yoxlanacaq