“Sabah” FK Prezident İlham Əliyevə təşəkkür edib
“Sabah” Futbol Klubu UEFA Çempionlar Liqasının liqa mərhələsinə yüksəlməsi münasibətilə Prezident İlham Əliyevin komandaya göstərdiyi diqqətə görə təşəkkür edib.
Masazır təmsilçisi bununla bağlı sosial şəbəkə hesabında paylaşım edib.
Klub Prezident İlham Əliyevin komandanın tarixi uğurunu təbrik etməsinin qələbənin sevincini daha da artırdığını bildirib.
“Sizin Azərbaycan idmanına, o cümlədən futbolun inkişafına göstərdiyiniz davamlı diqqət və qayğınız, idman klublarının inkişafı üçün yaradılmış imkanlar bu cür tarixi nailiyyətlər üçün böyük stimul verir, məsuliyyətimizi daha da yüksəldir”, – deyə paylaşımda qeyd olunub.
“Sabah” FK bundan sonra da Azərbaycanı Avropanın ən mötəbər futbol turnirində layiqincə təmsil etmək və ölkə futbolunun nüfuzunu daha da yüksəltmək üçün mübarizə aparacağını vurğulayıb.
Klub Prezident İlham Əliyevin “sonadək mübarizə aparmaq, qələbəyə inanmaq əzmini” aşıladığını qeyd edərək göstərdiyi yüksək diqqətə görə bir daha minnətdarlığını ifadə edib.
